Wata Babbar Kotu da ke jihar Kano ta yanke hukuncin kisa ta hanyar rataya ga wani matashi ɗan shekaru 22 mai suna Sagiru Rijiyar Zaki, bayan samun sa da laifin kashe mahaifiyarsa da kuma ‘yar uwarsa a cikin gida.
Al’amarin ya faru ne a ranar 7 ga Janairu, 2023, a unguwar Rijiyar Zaki da ke cikin birnin Kano. A cewar rahotannin da aka samu daga bakin masu bincike, Sagiru ya aikata wannan mummunan aiki ne bayan wata sabani da mahaifiyarsa ta riga ta yi aure a gidan mahaifinsa.
A lokacin da abin ya faru, Sagiru ya soke mahaifiyarsa, Rabiatu Sagir, da screwdriver a wuya, wanda hakan ya yi sanadin mutuwarta. Bayan haka kuma, ya kama ‘yar uwarsa mai suna Munawara, ya shake ta da zani har sai da rai ya yi halinsa. Wannan danyen aiki ya girgiza al’ummar unguwar da ma jihar gaba ɗaya.
Bayan kama Sagiru, aka gurfanar da shi gaban kotu inda Mai Shari’a Amina Adamu-Aliyu ta jagoranci zaman shari’ar. Alkalin kotun ta bayyana cewa an gabatar da shaidu biyu da kuma muhimman abubuwan da ke nuna cewa lallai Sagiru ne ya aikata wannan mummunan kisa.
A yayin shari’ar, lauyan gwamnati ya gabatar da shaidu da suka hada da jami’an ‘yan sanda da likitoci da suka tabbatar da abubuwan da suka faru da kuma irin raunin da aka gani a jikin waɗanda abin ya shafa. Sagiru ya musanta aikata laifin a kotu, sai dai shaidun da aka gabatar sun karfafa zargin da ake masa.
A karshe, kotu ta yanke masa hukuncin kisa ta hanyar rataya bisa laifin kisan kai, a karkashin sashe na 221(a) na dokar laifuka ta Jihar Kano, wanda ya bayyana cewa duk wanda ya kashe wani da gangan, zai fuskanci hukuncin kisa.
Wannan hukunci ya tayar da kura a kafafen sada zumunta da kuma tsakanin al’umma, inda da dama suka nuna damuwarsu kan yadda ake samun tashin hankali a cikin gida wanda ke kaiwa ga rasa rayuka. Wasu sun bukaci gwamnati ta kara himma wajen kula da harkokin lafiya ta fuskar kwakwalwa, musamman ga matasa masu fama da damuwa ko rikicewar tunani.
Wasu masana na ganin cewa akwai buƙatar wayar da kan matasa kan muhimmancin zaman lafiya da hakuri, musamman idan akwai sabani a cikin gida. Haka kuma, sun bukaci iyaye da malamai da su rika kula da tarbiyyar yara tun suna ƙanana.
Lamarin Sagiru Rijiyar Zaki ya zama darasi mai karfi ga jama’a da ke nuna yadda rashin iko da fushi ko wata matsala a gida ka iya janyo mummunan sakamako.
0 Comments