Ƴan Ta’adda Sun Kwace Makaman Sojoji da Kayan Yaƙi na Tiriliyoyin Naira

 

Ƴan Ta’adda Sun Kwace Makaman Sojoji da Kayan Yaƙi na Tiriliyoyin Naira – Inji Dan Majalisa

A yayin zaman Majalisar Wakilai a ranar Litinin, 12 ga Mayu, 2025, ɗan majalisa mai wakiltar mazabar Jos ta Kudu a Jihar Filato, Honarabul Yusuf Adamu Gadgi, ya bayyana wani lamari mai tayar da hankali dangane da tsaron ƙasa. A cewarsa, ‘yan ta’adda – musamman daga ƙungiyar Boko Haram – sun samu nasarar kwace makaman yaƙi da kuɗinsu ya kai tiriliyoyin naira daga hannun dakarun Najeriya, a yayin hare-haren da suka kai a sansanonin soja a yankin Arewa maso Gabas.

Gadgi ya bayyana haka ne yayin tattaunawa kan wata ƙudiri da abokin aikinsa, Honarabul Ahmed Satomi daga Borno, ya gabatar, wadda ta shafi gobarar da ta tashi a ɗakin ajiye makamai na sansanin sojin Giwa Barracks da ke jihar Borno, da kuma ƙalubalen da ake fuskanta a fannin tsaro a jihohin Borno da Yobe.

A cikin jawabin nasa, Honarabul Gadgi ya ce: “A halin da ake ciki, rayukan ‘yan Najeriya ba su da tabbas. Muna kashe biliyoyin naira don kare jama'a, amma makaman da aka siya suna faɗa hannun 'yan ta'adda." Ya ƙara da cewa akwai motocin yaƙi sama da 40 da aka siya domin dakile ‘yan ta’adda, amma yanzu suna cikin ikon masu tada zaune tsaye.

Dan majalisar ya nuna takaici da damuwarsa kan yadda gwamnatin tarayya da hukumomin tsaro ke nuna gazawa wajen kare kayan yaƙi da rayukan jami’an tsaro. Ya buƙaci a gudanar da bincike mai zurfi, tare da ɗaukar matakin gaggawa domin shawo kan wannan lamari mai haɗari.

Rahotanni sun nuna cewa ‘yan Boko Haram da ISWAP na amfani da kayan yaƙi da suka kwace wajen kai farmaki kan al’umma da jami’an tsaro, lamarin da ke ƙara dagula harkokin tsaro da hana zaman lafiya a yankin Arewa maso Gabas.

Gadgi ya kuma jaddada cewa idan aka ci gaba da barin irin wannan lamarin ya faru, to tsaron Najeriya gaba ɗaya na cikin hadari. Ya nemi gwamnati ta gudanar da bincike mai zaman kansa domin gano hakikanin yadda makaman ke barin sansanonin soja har suke faɗawa hannun 'yan ta'adda.

Ya yi kira ga Shugaban Ƙasa da manyan hafsoshin tsaro da su dauki alhakin wannan gazawa, domin kare martabar rundunonin tsaro da kuma kare lafiyar al’umma.

Masana tsaro da dama sun nuna goyon baya ga wannan kira, inda suka ce rashin kula da ajiya da kariyar makamai na daga cikin manyan matsalolin da ke janyo tabarbarewar tsaro a Najeriya.

A ƙarshe, wannan furuci daga dan majalisar ya sake jaddada bukatar yin gyara cikin gaggawa a fannin tsaro, tare da tabbatar da cewa makaman da ake siya da kuɗin haraji na al’umma ba su faɗa hannun waɗanda za su yi amfani da su wajen kashe jama’a ba.