Dauda Kahutu Rarara Ya Samu Sarautar “Sarkin Waƙar Ƙasar Hausa”An naɗa fitaccen mawaki Dauda Kahutu Rarara a matsayin Sarkin Waƙar Ƙasar Hausa. An yi nadin ne a yayin wani biki na musamman da Sarkin Daura ya jagoranta, inda aka ba Rarara rawanin girmamawa bisa gudummawar da ya bayar wajen bunƙasa waƙar Hausa da al’adu.

 

Masarautar Daura, jihar Katsina, ta naɗa fitaccen mawakin Hausa, Dauda Kahutu Rarara, matsayin “Sarkin Waƙar Ƙasar Hausa”, a wani taro na musamman da aka shirya domin girmama shi, lamarin da ya janyo cece-kuce a tsakanin al’umma. 

A cewar rahotanni, Mai Martaba Sarkin Daura, Alhaji Faruk Umar Faruk, ne ya yi wa Rarara wannan sarauta bisa la’akari da rawar da mawakin ya taka wajen waƙa da faɗakarwa a fagen ƙasar Hausa da kuma tarihin waƙoƙin siyasa da al’adu. 

An shirya bikin nadin sarautar ne a fadar Sarkin Daura a ranar Asabar, 13 ga Disamba, 2025, inda Rarara ya gayyaci jama’a su halarci wannan muhimmin taro. 

Sai dai wannan nadin sarauta ya haifar da ra’ayoyi daban-daban tsakanin jama’a. Wasu masoya mawakin sun taya shi murna, suna ganin wannan yabo ce ga gudummawar da ya bayar wajen bunƙasa waƙa da adana al’adun Hausawa. 

A gefe guda kuma, wasu sun nuna rashin amincewa da nadin, suna mai cewa bai kamata a ba Rarara sarautar ba, bisa wasu dalilai na fahimta game da ayyukansa a baya. 

Haka zalika, fitaccen mawakin ya riga ya samu wasu lambobin yabo a baya, ciki har da digirin girmamawa (honorary doctorate) daga wata jami’a ta ƙetare, saboda gudummawar da ya bayar a fannin waƙa da hidimar al’umma.